Saphaloo Kadiir irraa
“Qaamaa hir’uu tahuus onneen dhugaa,
Na keessa jirti akkamittiin taa’ee muuga,
Gamni namaa barayyu hin fudhatu shira,
Aniis qabsoon haada gabrummaan cira”
Je’e kunoo atleetiin Oromoo gootichi,
Harkasaa caase xumuramnaan fiigichi,
Kan lammii quuqamee sabaa hadoodu,
Kan shira diinaa jibbee iyyee gadoodu,
Miidhaa obboleewwanii arkuu jibbee,
Kanaaf karkarsuu dide diinaaf dibbee,
Taammiruun arra kunoo gooban gale,
Nutiis haa dirmannuuf akkuma kalee,
Silaas goonni daandii gootaa hordofaa,
Ofii gubachaa akka dungoo sabaaf ifaa,
Saniif xurree Fayyeen baase irra dhufee,
Injifatee kunoo galmee wayyaanee cufe,
Haa dhalatu, haa nuu dhufu ammaallee,
Arraas Rio irratti kunooti gurraan gallee,
Gaafattii Fayyisaan daandii kana baase,
Oromoon martiinuu harka isaa ol kaase,
Waa mara si waliin jirra leenca keenya,
Je’ee dirmateef inni taanaan fakkeenya,
Arraas haa taanuuf akka Faayyee taane,
Haa dirmannu kaa bakka takkaa kaanee,
Osoo isaan nu dhangalaasan dhiiga,
An hanga yoomiin alagaa jecha fiiga,
Daandii Fayyisaan na dura baase irra,
Deemeen seenaa haareyoomsa arra,”
Je’ee muratee goonni nuuf as bahee,
Miidhama Oromoo addunyaan gahee,
Akkuma inni daandii Fayyeerra deeme,
Nuus xurree Fayyee haa yaanuufi mee,
Taammeen galmeesse seenaa dachaa,
Akkuma Fayyee isaas gurraan galchaa,
Sabni goota qabu duruu moo’ee galaa,
Nu wal dhageenyaan seenaan if dabala.
Saphaloo Kadiir / Abdulbasit
Fuulbana, 2016